منتديات الاميرة يارا - اساليب الوقاية من الاختراق

السلام عليكم

اعزائي اعضاء المنتدى

اقرأ الموضوع للاخر حتى لو كان طويل
فهو مفيد الك عشان تحافظ على حالك من العابثين

الموضوع من كتابتي الخاصة ... وانا اسمح لاي شخص حب ينقل الموضوع ينقلو حتى تعم الفائدة

كثيرا ما نسمع بنت بتعيط لحدا يرجعلها ايميلها اللي حدا اخترقو وعليه صورها وصور صاحباتها وصور العيلة.
او شب حدا اخترقلو ايميلو ولطش كلمات المرور اللي مخزنها ع ايميلو وسرق الفيزا تبعتو وحساب البنك وخلاه عالحديده

كيف بدي احمي جهازي من الاختراق ؟ وكيف بدي احمي ايملي من المخترقين؟ شو الحل عشان نمنع سرقة ملفاتنا الخاصة؟ وشو لازم نتصرف في حال وقعنا في فخ المخترقين؟

كل هاي الاسئلة لازم يكون عند كل شخص منا اجابة عليها

قصة واقعية حدثت معنا بالمنتدى ... تابع للاخر عشان تعرفها

للاسف ثقافتنا في امن المعلومات شبه معدومة ويا ريت هالشغلة مقتصرة على الافراد فقط ... اغلب شركات البلد بينا وبين الحماية جبال ووديان

حبيت اشرح عن هالموضوع لعل وعسى يكون فيه فائدة للجميع عشان ما توقعو في فخ المخترقين. ووقتها ما بنفع الندم.

بداية لازم يكون عندك يقين انه لا يوجد حماية كاملة
فمهما اخذت الاحتياطات سيجد المخترق المحترف طريقه ( ونادرا ما تجد المحترفين يسيؤون)

مكافح الفايروسات
من اهم سبل الحماية لجهازك وملفاتك هو برنامج مكافح فايروس
فهو مهم جدا ...
يفضل استعمال نسخة مرخصة وغير مسروقة عشان تقدر تعمل تحديث

يعني انت شاري جهاز كمبيوتر بمبلغ وقدره ابصر كم الف شيقل دافع عليه
وبدك تحط عليه معلومات بتخصك وبتهمك؟
ما تبخلش عليه ببرنامج حماية ب 150 شيقل .

كلمة المرور
وهي اسهل انواع الاختراقات
باسوردك مش لازم تكون بس ارقام
برنامج تخمين الباسوردات ممكن بسهولة يطلع الباسورد لو كانت ارقام فقط.
دائما وابدا استعمل حروف + ارقام + رموز
ما يقل طول الباسورد عن 8 خانات
ما تخزن كلمة المرور ع جهاز الكمبيوتر او الايميل
ما تعمل تخزين لكلمة المرور عالمتصفح اللي بتستعملو

الصفحات المشبوهة

ما تدخل روابط ما عمرك شفتها بحياتك ... يعني على سبيل المثال
وصلتك رسالة خاصة من عضو غريب وفيها رابط
مش ضروري انك تفتح الرابط ... لانو احتمال يكون ملغم ...
ولو فتحتها بالغلط .. وكان بلزم تعبي بيانات عشان تسجل مفش داعي تعبي بياناتك الخاصة وتستعمل كلمة المرور نفسها للي بتستعملها لايميلك او عضويتك بالمنتدى
ولو كنت متنح وركبت راسك عالتسجيل بالصفحة سجل بمعلومات جديدة مش نفس معلوماتك الحقيقية

البرامج والملفات الملغومة

لو احتجت برنامج من النت ومش حابب تشتريه بمبلغ
ما فش داعي تروح على جوجل تكتب اسم البرنامج
واول موقع بيجي بطريقك تفوت وتحمل البرنامج منو
ولو سويت هيك و الانتي فايروس قلك انو فايروس
ما تتشاطرش وتسكر الانتي فايروس عشان تشغلو
مهو اكيد انت مش افهم من الانتي فايروس

لما تحتاج برنامج جديد ، اطلبو من مصدر موثوق يعني عضو بتعرفو
وتجنب تحميل برامج من مواضيع اعضاء مشاركاتهم اقل من 50 مشاركة
وما تتردد بطلب البرنامج من مشرف القسم او ادارة المنتدى

عالمسنجر والايميل
ما تستقبل ملفات من اشخاص مجهولين او معرفتك فيهم ضئيلة
ما تفتح ايميلات موجودة في الjunk mail
ما تفتح ايميلات شاكك فيها
ايميل وصلك من شخص ما بتعرفو ما تخلي الفضول يجبرك على فتح الايميل

يا جماعة الخير
هالموضوع بهمني البنات تستوعبوا اكتر من الشباب
ملفاتكم ع جهاز الكمبيوتر هي عرضكم

اذا وصلت لايديين ضعاف النفس بتسببلكم مشاكل كبيرة

اذا بتلتزمو بالحكي اللي حكيناه
عالاقل انت هيك بتضمن انو محدا يسرق ايميلك او عضويتك بالمنتدى
ولا يفوت ع جهازك بدون اذنك

طيب كيف بدنا نعرف انو فيه حدا مخترق جهاز الكمبيوتر وشو لازم نتصرف بس نعرف ؟
اذا حسيت باشي غريب بالكمبيوتر على سبيل المثال
صار فجاة بطيء او الماوس صار يتحرك لحالو او شيء من هالقبيل

على طول افصل الجهاز عن الانترنت وراقب الجهاز برجع لوضعو الطبيعي والا لا
اذا رجع الجهاز طبيعي ارجع اشبك عالنت وراقب رح يرجع يصير نفس الاشي والا لا
لو رجع صار مرة تانية ، كن على يقين انو فيه حدا مخترق جهازك وبكعكش فيه
وصار زارعلك مزرعة من ملفات التجسس في الجهاز والباتشات اللي بتساعدو يسرق باسورداتك وملفاتك الشخصية

فافصل النت نهائي عن الجهاز وباشر بالفورمات لانو اضمن الطرق للتخلص من ملفات التجسس المزروعة بجهازك.

وبنفس الوقت عالسريع بتغير كل الباسوردات الي بتستعملها.

حالة حقيقية حصلت عنا بالمنتدى:
عضو يدعى Mr-Melad تم تجميد عضويته (فرمناه فرم) لمحاولته التعرف على بنات المنتدى بهدف اختراقهم.
فقام باختراق ايميل مشرفة من المشرفات عن طريق برنامج كان منزلو في قسم البرامج
برنامج يدعي انو لمعرفة مين عاملك بلوك عالمسنجر ...

وللاسف الاخت نزلت البرنامج ووقعت في الفخ ... فاخترق جهازها وعضويتها بالمنتدى
وقام بتنزيل مواضيع غير لائقة من عضويتها

احنا تداركنا الموضوع فورا وقمنا باللازم.

والخطأ كان خطأ عضو ما كان يعرف الحكي المكتوب بهالموضوع.
وهي السبب اللي خلاني اكتب هالموضوع
لحتى نزيد نسبة الوعي عندكم وما توقعو بالفخ اللي وقع فيه غيركم

اما بخصوص منتدانا كونو على علم انو آمن ولم تسجل فيه تاريخه حالة اختراق واحده.
فنحن لدينا فريق متخصص في امن المعلومات للتصدي لاي هجمات ومحاولات طفولية للاختراق

وملخص للموضوع الطويل والغير ممل

1. استعمل كلمة مرور معقدة
2. ما تفتح روابط مجهولة او ملفات مجهولة المصدر
3. ما تنزل برامج مجهولة المصدر
4. استعمل انتي فايروس مرخص ، واللي وضعو ما بسمحلو يشتري انتي فايروس استعملو برنامج AVG FREE فهو انتي فايروس قوي ومجاني ويحمي وانا شخصيا استعمله.

والسلام ختام

منقول